Íþróttamanneskjan blótar ekki brekkunni, heldur sér í henni ómetanlegt æfingatæki. Tekur á, fær jafnvel blóðbragð í munn, aftur niður, aftur upp. Hraðar, hærra, sterkar.
Lífsins brekkur eru mis brattar, mis velkomnar. Við sjálf mis undirbúin. Alltaf jafn gott að minna sig á að það sama gildir um allar heimsins brekkur. Engin er endalaus! Allar geta þær kennt okkur eitthvað, styrkt okkur eitthvað.
Fátt er varasamara við stofnun fyrirtækis en aðgengi að endalausu fjármagni. Líklega einna helst það að stofnendur telji sig hafa endalausan tíma til athafna.
Hræðsla eða óöryggi er ekki viðbragð sem þarf að æfa. Innbyggt og inngróið. Ómetanlegt á gresjunni. Kom genunum þínum að þessum skjá. Þessum orðum.
Hræðsla og óöryggi drepur fleiri drauma í dag en nokkuð annað. Skelfing hamlandi fyrir skapandi manneskjur. Dregur úr drifkrafti. Býr til löngun í bið og frest.
Frétt dagsins: Það er enginn að biðja þig að hlaupa yfir gresjuna með ljónin lúrandi á kantinum, aðeins að stíga þetta eina litla skref. Það verður ekkert betra seinna. Þú ert klár!
Skráðu þig á póstlistann til að fá gagnlega litla mola jafnt sem lengri pistla í pósthólfið.
© 2022 Freyr Ólafsson
